كل ما تريد ان تعرفه عن أقسام كلية العلوم وموادها ومجالات شغلها ونظام الساعات المعتمده

كل ما تريد ان تعرفه عن أقسام كلية العلوم وموادها ومجالات شغلها


كلية العلوم 4 سنوات دراسية والدراسة فيها باللغة الانجليزية وهى تتبع نقابة المهن العلمية ، الحد الأدنى لكليه علوم 93.7%، ومن رياضة 79.5% لهذا العام

* ازاى بتخصص فى القسم اللى انا عايزه؟

1) جامعات زى القاهرة واسكندرية وغيرها بتتخصص من سنة تانية على اساس تقدير اولى
2) جامعات زي حلوان والسويس وغيرها بتتخصص من سنة اولى على اساس المجموع الاعتبارى وهو مجموعك فى الثانوية العامة + مجموع مادة او مادتين من (فيزياء ، كيمياء ، رياضة ، جيولوجيا) مثال: من دليل الطالب لعلوم السويس 
3) جامعات اخرى بتتخصص بطرق مختلفة ، شوف طريقة التخصص والاقسام المتاحة بجميع جامعات الجمهورية: حمل من هنا 

* ايه نظام الساعات المعتمده ده؟ وايه الفرق بينه وبين النظام القديم؟  من هنا

* أقسام كلية العلوم المفعلة بجامعة القاهرة 24 قسم منهم:
  7 اقسام متاحة لطلبة علمى علوم فقط
 8 اقسام متاحة لطلبة علمى رياضة فقط
 
9 اقسام مشتركة لطلبة علمى علوم وعلمى رياضة

اولا: 8 اقسام لطلبة علمى رياضة فقط

1) علوم حاسب منفرد: بتدرس مبادئ البرمجة من النظم العددية والخوارزميات وهياكل البيانات ونظم التشغيل وقواعد البيانات والذكاء الاصطناعى والتشفير وغيرها ، وشغله واسع اوى فى الكمبيوتر والسوفت وير
 ، هى شبه قسم علوم حاسب فى كلية حاسبات ومعلومات والفرق ان عندنا الاهتمام بالنظرى والرياضة على حساب التطبيق بس لو قدرت تفهم النظرى كويس هيبقي سهل عليك تتعلم اى تطبيق عليه وهتبقي كويس عن اى حد ولازم تاخد كورسات عشان تطور نفسك ، ولو اتخرجت بتقدير جيد تقدر تقدم فى منحة وزارة الاتصالات (ITI) ، شروطه: تختار جبر واحصاء ترم 1 وجافا وميكانيكا ترم 2 وتنجح فى رياضة 2 وجافا 
، شغله: فى وحدات تكنولوجيا المعلومات فى الشركات والمدارس والجامعات ، مطور برامج ، مصمم او مطور شبكات ، مور تطبيقات الموبايل ، مطور جافا ، مصمم قواعد بيانات وغيرها ، مواده:
 
2) رياضيات منفرد: يعني رياضه باحته وتطبيقية يعنى لو بتعشق الرياضه ادخله لكن انت كويس فيها مش بتحبها يبقي فكر فى حاجة بتحبها ، قسم الرياضيات تقريبا الوحيد اللى عدد مقرراته يٌعتبر الأقل مقارنة بأقسام الكلية التانية ومعظم المواد اللى هتدرسها فى القسم بتتطلب بذل مجهود من الطالب ، كل اللى بتتطلبه الرياضيات هو أن الطالب يكون مجتهد ، مش شرط يكون عبقرى زى آينشتين علشان يدرس رياضيات أو يستمتع بعلومها ، شغله: فى المجال الاكاديمي ، مراكز الاحصاء والمتابعة ، معامل الابحاث ، تاخد سنة تربيه وتبقي مدرس ، شروطه: تاخد جبر واحصاء وتنجح رياضة 2 ، مواده: اضغط هنا 

3) رياضة/حاسب: نفس الكلام ونفس شغل قسمي رياضة وحاسب وبتدرس نص المواد من رياضه ونصها من علوم الحاسب ، شروطه: انجح فى رياضة 2 وجافا ، مواده: اضغط هنا

4) رياضة/احصاء: نفس الكلام بس بتاخد نص دراستك رياضه ونصها التانى احصاء ، وشروطه: انجح رياضة 1 & 2 ، مواده: اضغط هنا

5) رياضة/فيزياء: قسم يدرس الرياضيات والفيزياء والتجارب والقوانين والعلاقات الرياضيه والدوائر الكهربائيه ، شغله: مدرس او في معامل الابحاث وغيرها و شروطه: تختار جبر وماده من (احصاء - فلك - جيولوجيا - جيوفيزياء) ، مواده: اضغط هنا

6) رياضه/فلك: بدرس مواد رياضه و مواد فلك و شغله في مصر نفس شغل فلك منفرد ورياضة منفرد ، شروطه: انجح جبر وفلك ، مواده: اضغط هنا

7) فلك منفرد: بتدرس تاريخ الفلك ، وأرصاد العين المجردة ، النظام الشمسي ، الظواهر الفلكية، حركات الكواكب والنجوم الظاهرية ، والحشود والنجوم وأنواعهم ، المادة بين النجمية ، والمجرات ، نشأة الكون بصفة عامة ، التعرف علي السماء ليلا ، خرائط النجوم ، الكواكب والكويكبات النجمية وطرق التعرف عليها وغيرها ، شغله: فى مرصد حلوان ، مرصد القطامية ، باحث بمركز الاستشعار عن بعد او بالمركز القومي للبحوث الفلكية واي مركز في مصر فيه فيزيا ، هيئة الطاقة الشمسية ، المركز القومي للفلزات ، فى وكالة ناسا الفضائية زي عصام حجى ، شروطه: اختار وانجح جبر وفلك ، مواده: اضغط هنا

8) فضاء منفرد: هو هو فلك منفرد نفس الشروط ونفس المواد الاختياريه ونفس الشغل بس الفرق ده فلك وده علوم جويه ، شروطه: انجح فلك ، مواده: اضغط هنا

ثانيا: 7 اقسام لطلبة علمي علوم فقط

9) كيمياء/كيمياء حيوي: بيدرس العمليات الحيويه في جسم الانسان زي البروتين والفيتامينات والكربوهيدرات وبيدرس الاحماض النوويه (DNA) وعلم المناعة وعلم الوراثة وعلم الهرومونات والانزيمان والاورام والبيولوجي وتدرس فيها جميع التفاعلات الكميائيه الخاصه بالكائن الحى وجسم الانسان وتدرس فيها الكيمياء العلاجيه زى المسكنات وخافضات الحرارة ومضادات البكتيريا والفطريات والفيروسات والطفيليات وهى من اقوى الفروع فى الكيمياء وتتخصه من بيولوجى ، بيدرس كيميات كتير (كيمياء عضوية وغير عضوية وتحليلة وفيزيائية وكيمياء العقاقير وكيميا الفيتامينات وكيميا إكلينيكية) ، كمان بيدرس الهندسة الوراثية والعلاج الجيني والاحصاء الحيوي ، شغله: في معامل وشركات التحاليل الطبية وشركات ومصانع الادوية ، ومعاهد الاورام ، ومعاهد السرطان ، ومصانع وشركات المستحضرات الطبية ، ومضانع كتير جدا زي البتروكيماويات ومصانع الخميرة وغيرها ويستحسن تاخد دبلومه التحاليل الطبيه او دبلومة الكيميا الحيوية ، لمعلومات اكتر عن القسم: اضغط هنا وشروطه: تختار ماده حيوان و ماده تانيه من (فلك - بيوفيزياء - جيولوجيا - جيوفيزياء - نبات - حشرات) و اجيب جيد في كيمياء 1 & 2 وتقدير عام جيد جدا ، مواده: اضغط هنا

10) كيمياء/كيمياء ميكروبيولوجي: هى علم الاحياء الدقيقة وتدرس فيه كل فروع الميكروبيولوجى (البكتريا والفطريات والطحالب والفيروسات) وحياتها وكل حاجه و تأثير الميكروبيولوجي على الانسان والامراض اللي بيسببها والانزيمات والسموم الميكروبية والهرمونات النباتية وعلم المناعة وعلم الوراثة وعلم الاحماض النووية (DNA) وميكروبيولجي طبية وميكروبيولوجي الاغذية والاحصاء الاحيوي وتدرس فيه كل فروع الكيمياء تقريبا (حيويه وعضويه وتحليله وفزيائيه) ، وشغله: فى معامل وشركات التحاليل الطبية ، وشركات الادويه ، وفى المستشفيات ، وفى معامل المكيروبيولوجي ، وتنقية المياة فى محطات وشركات المياة ، وشركات الاغذية ، شركات الالبان ، وشركات الكيماويات ، وله الافضلية فى الشغل هو وقسم الكيمياء الحيوية فى بعض شركات الادوية داخل مصر وهما الوحيدين المعترف بهم كاخصائيين بعد الماجستير فى التحاليل خارج مصر (السعودية) ، 
شروطه: تنجح نبات و كيمياء وتختار ماده من (فلك - بيوفيزياء - جيولوجيا - جيوفيزياء - حيوان - حشرات) ، مواده: اضغط هنا
****************************
11) كيمياء/حيوان: يدرس الانسان وكل ما يتعلق بالمملكه الحيوانيه فيدرس الفسيولوجى (علم وظائف الاعضاء) والامبريولوجى (علم الاجنه) والهيماتولوجى (علم امراض الدم) والسيريولوجى (علم المناعه) والاناتومى (علم التشريح) والباراسيتولوجى (علم الطفيليات) والبيولوجي بتاع الحيوان والفقاريات و اللافقاريات وعلم الوراثه وعلم الانسجه ، وشغله: فى معامل وشركات التحاليل الطبيه ، شركات الادوية ، اطفال الانابيب ، الحقن المجهرى ، بنوك الدم ، المراكز الطبية لعلم الاجنة ، فى مراكز البحوث المختلفه وغيرها ، وشروطه: انجح حيوان واختار ماده تانيه من (فلك - بيوفيزياء - جيولوجيا - جيوفيزياء - نبات - حشرات) ، مواده: اضغط هنا

12) كيمياء/نبات: يدرس كل ما يتعلق بالمملكه النباتيه بداية من تشريح النبات وعلم المناعه وفسيولجى اناتومى ومورفولوجى وتنفس و علم البيئة ، علم الشريح ، علم الوراثة ، ميكروبيولوجى ، فيسيولوجى ، طحالب ، نباتات طبية ، موليوكيولار بيولوجى ، تطبيقات موليكيولار بيولوجى + بيوتكنولوجى ، علم الفلورا ، هندسة وراثية ، زراعة انسجة ، والمورفولوجى والبيولوجي بتاع النبات وتصنيفاته والعوامل البيئيه اللي بتأثر فيه و التلوث والانزيمات والطحالب ، والشكل الظاهرى ودورة الحياة للنباتات مغطاة البذور، تركيب الزهرة، التلقيح والاخصاب وتكوين البذور، البذور والإنبات، تركيب البذرة، العوامل التى تؤثر على الإنبات والتغيرات التى تحدث خلال الإنبات، نموذج لبذور وبادرات النباتات ذوات الفلقتين والفلقة الواحدة: الشكل الخارجى للنبات:نشأة الجذر ووظائفه - مناطق الجذر المختلفة وتحورات الجذر ، البراعم ، الأنواع المختلفة للاوراق ووظيفتها – توزيعها- الإفتراق الزاوى - تركيب الأوراق – التحورات) ، علم التشريح النباتى: تركيب الخلية النباتية . مكونات البروتوبلازم و مكونات الخلية غير البروتوبلازمية ، الجدارالخلوى ، النقر، الأنسجة النباتية والإنشائية والمستديمة والوعائية المركبة ، وشغله: في معامل الابحاث والتحاليل وشركات الادويه وغيرهم ، وشروطه: تاخد نبات و ماده تانيه من (فلك - بيوفيزياء - جيولوجيا - جيوفيزياء - حيوان - حشرات) ، مواده: اضغط هنا
****************************
13) كيمياء/حشرات: بدرس البيولوجي الخاص بالحشرات و تشريح انسجتها و مورفولوجي الحشرات و تصنيفاتها و تقسيماتها وعلم بيئه الحشرات و علم الطفيليات والوبائيات و تحاليل الطفيليه والفيسيولوجي للحشرات ومكافحه الافات والسيطره عليها والمناعه والميكروبيولوجي والباثولوجي للحشرات وعلم السموم الشكل الخارجى والداخلى والأداء الوظيفى للحشرة ، أنماط الحياة ، التأثيرات البيئية والدورة الفصلية ، أشكال التأثيرات المتبادلة فى الآهلات الحيوية المجموعات الهامة للحشرات (الجراد والصراصير، القمل، الذباب، الفراشات وأبو دقيق، الخنافس، الدبابير والنحل، البراغيث ) ، الحشرات النافعة ودورها فى تلقيح النباتات ونشر البذور ، المنتجات التجارية المشتقة من الحشرات ، الحشرات المفترسة والمتطفلة ودورها ، أهمية الحشرات ككانسات ، مركز الحشرات الهامة فى النظام البيئي وغيرها ، وشغله: في معامل وشركات التحاليل الطبية ، والشركات الادويه ، مصانع المبيدات الحشرية ، مراكز مكافحة الحشرات ، معامل البحوث الزراعيه ، وزارة الزراعة وغيرها ، وشروطه: اختار حشرات وحيوان ، مواده: اضغط هنا 
****************************
14) بيوفيزياء منفرد: البيوفيزياء هي علم قائم بذاته ومختلف عن الفيزياء و الاحياء ، هو يعتبر تطبيق لمباديء الفيزياء وتقنياتها لدراسة تركيب ووظيفة الخلية الحية ودراسة بعض القوانين الفيزيائية التي تؤثر في الجزيئات الحيوية والعمليات الحيوية ندرس بها الكهربية خلال الجسم الحيوى والجهاز العصبى والخلية العصبية ، الجهد الكهربى للأعصاب ، رسم عضلات القلب والمخ والعين ، فيزياء الأشعة السينية التشخيصية ، استخدامات الانويه المشعه فى أجهزه القياس الإشعاعى الأساسية وتطبيقاتها والوقاية من الإشعاع ، وحدات الوقاية الإشعاعية وحدودها فى الطب النووى ، تطبيقات الحرارة والبرودة ، حفظ الدم والأنسجة والجراحه بالتبريد ، وإستخدام الضوء فى الطب فلها تطبيقات في الطب حيث توفر تفسيراً للعلاقات الوظيفية بين أجزاء الجسم وفي دراسة نظام المناعة ضد الامراض وتم اعتماد أربع تخصصات رئيسية وهى: البيوفيزياء الجزيئية و الطبية و النظريه و البيئية والمدرستين المتخصصتين واللى ليهم النصيب الكبير من الاهتمام والتطور هما البيوفيزياء الجزيئية والبيوفيزياء الطبيه ، وشغله: في المستشفيات والمعاهد الطبيه زي الاورام ومعاهد الليزر ومعهد بحوث امراض العيون ، والقصر العيني ، 57357 ، فى مراكز البحوث زي البحوث النووية ، بحوث الاشعاع والاشعاعات واثرها علي الخلايا ، المركز القومى للبحوث ، التصوير الاشعاعى والعلاج الاشعاعي ، شركات الاجهزة الطبية والمناظير وغيرها ، شروطه: انجح بيوفيزياء 1 & 2 وماده من (حيوان - بيولوجي) ، مواده: اضغط هنا

15) جيولوجيا منفرد: الجيولوجيا هي علم دراسه الارض وأصلها وطبقاتها ومكوناتها وكيفية تكوينها وتطورها ، هتدرس الميكانيكا اللى بتتكون بيها الظواهر الطبيعية زي الجبال العادية والجليدية والبراكين وتاريخ الارض منذ النشاة وكيفية وترتيب تكونها ، تقدير عمر الأرض النسبي والمطلق ، الجدول الزمني لتاريخ نشأة الأرض ، الحفريات والتحفر ، التبلور ، الخواص الفيزيائية والكيميائية للمعادن وتقسيماتها وانواعها ، كمان هتدرس جيولوجيا البترول وجيولوجيا المياة ، وجيولوجيا حقلية وغير حقلية ، وجيولوجيا مصر وافريقيا وغيرها ، وشغله: في شركات البترول ، والمياه ، وجهاز شئون البيئه ، وقطاع الاثار ، والمناجم ، الهيئة القومية للاستشعار عن بعد ، علوم الفضاء ، المراصد الجيولوجية ، ركات التعدين ، واغلب شغل صحرا و سفر و في مكاتب بردو ، شروطه: اختار مادة من (حيوان – بيولوجي) وتقدير جيد جدا في جيولوجيا 1 & 2 و جيد جدا تقدير عام والقسم بياخد 10 طلاب فقط ، مواده: اضغط هنا

ثالثا: 9 اقسام مشتركه متاحة لطلبة علمي رياضه و علمي علوم

16) كيمياء منفرد: بتدرس الكيمياء بكل فروعها عضويه وغير عضوية وحراريه وكهربيه وتحليليه وفيزيائية وحيوية وثيرمو والكترو واروماتيك وستريو وبروتين وكربوهيدرات وكوانتم ، وشغله: فى معامل وشركات التحاليل الطبية ، شركات الادوية والاسمدة ومستحضرات التجميل والسكر والمياة والكهرباء ومصانع الزيوت والدهون والصابون والمنظفات الصناعية والدهانات وصناعة البطاريات والسبائك والحديد والصلب ، بيفضل فى شغل المصانع وفى الكيمياء الشرعية عن اى قسم اخر ، شروطه: اختار اى مادتين واجيب جيد في كيمياء 1 & 2 و تقدير عام جيد جدا ، مواده: اضغط هنا

17) كيمياء/جيولوجيا: بيدرس نص مواده جيولوجيا والنص التاني كيمياء وميزته انه يقدر يشتغل بالاتنين الكيمياء والجيولوجيا يعني ماسك العصاية من النص ، وشغله: نفس شغل قسمي كيمياء وجيولوجيا منفرد ، وشروطه: اختار جيولوجيا واي ماده تانيه ومتوسط التقدير فى جيولوجيا 1 & 2 جيد وتقدير عام جيد ، مواده: اضغط هنا

****************************
18) كيمياء/فيزياء: يدرس نص مقرراته كيمياء ونصها فيزياء ، وشغله: نفس شغل قسمي الكيمياء والفيزياء ، وملهوش شروط اختار اي مادتين واطلع تانيه وادخله علي طول ، مواده: اضغط هنا 

19) فيزياء/فلك: القسم ده زي فلك منفرد بس نص المواد فيزياء ونص فلك ، بندرس فيه النجوم وازاي بتولد ومرورها بعدة مراحل حتى أنفجارها وكيفية تسميتها ، وهانعرف كل حاجة تخص كواكب المجموعة الشمسية من تركيب التربة والغلاف الجوي الخاص بكل كوكب والاقمار التي تدور حول كل كوكب ، وبنعرف انواع كل التلسكوبات وازاي بنستخدمها في الرصد الفلكي بأنواعه ، وبنعرف الاقمار الصناعية وكيفية دورانها في مدارات حول الشئ التي اطلقت من أجله ، هندسة سماوية: بندرس فيها الانظمة المختلفة اللى منها بنعرف مواقع النجوم والكواكب بالنسبة للكرة الأرضية ، وازاي فصول السنة بتحدث وبندرس فيه التقويم وازاي بنحسبه ، ميكانيكا الفضاء: بتدرس انواع المدارات اللي بتدور فيها الاقمار الصناعية وخواصها وازاي القمر الصناعي بيدور فيها و امتى يكون في الفضاء ، الفلك الفيزيائي: بندرس فيها الفلك من الاتجاه الفيزيائي يعني ازاي النجوم بتولد وبتعيش فترة شباب الي ان تنتهي بالانفجار ، وبتدرس حركة الكواكب والمجرات ، شغله: نفس شغل قسمي فلك منفرد وفيزياء منفرد ، مواده: اضغط هنا

20) فيزياء/علوم جويه: كوبي بيست من اللي فوقيه ، بس الفرق هنا انك بتدرس كل حاجة تخص الأرصاد الجوية بس مش انت اللي بتشتغل فى النشرة الجوية بتاعة الساعة تسعه ديه لا انت اللي بتجبلهم الداتا اللي هما بيقولوها وانت بقى بتدرس طبقات الغلاف الجوي و ازاي الرياح بتتحرك وهكذا ، بجانب انك ليك فرصه انك تشتغل في برج المراقبه في المطار علشان تشوف حالة الجو هاتسمح للطائرات تقلع ولا لأ ، وغيرها ، مواده: اضغط هنا

21) فيزيا منفرد: قسم عشاق الفيزياء ودراسته فيزياء كهربيه وحراريه وكل انواع الفيزياء والدراسة فالقسم عايزة انك تكون معتمد علي نفسك شوية وانك ما تعتمدش فقط على المنهج الجامعي و تشتغل مع نفسك في البحث الخارجي ، والقسم لازم تتخرج منة على الاقل بتقدير جيد جدا عشان تلاقي شغل محترم معيد في اي جامعة خاصة او شغل في هيئة الطاقة النووية ، وفية شغل في مصانع الاجهزه الكهربيه ومصانع الحديد والفحم بيكون فني بيمسك الالات الكبيرة وبيعملها حسابات زي حسابات الديناميكا الحرارية وهكذا، كفيزيائى طبي ، وشغل اكاديمي اكتر من كونة فني يعني باحثين في مراكز البحوث او في مدينة زويل او اعضاء هيئة تدريس فالجامعات او باحث في الجامعات الخاصة او الاجنبية او سيرن او وكالات الفضاء بتحتاج فزيائين او المفاعلات النووية بس كل دة خارج مصر لازم تدرس ماجيستير ودكتوراه و ايضا لازم تدور علي منحة عشان تدرس ماجيستير ودكتوراه برة لان الفيزياء من العلوم التقيلة اللى محتاجة تدرسها بره وعلي الاقل عشان تاخد منحة للدراسة فالخارج لازم تكون جايب جيد جدا ، ولو الدنيا قفلت فى وشك تعرف تبقي مدرس فيزياء بعد ما تاخد سنة تربوي ، شروطه: تختار اى مادتين وانجح فى فيزياء 1 & 2 وتقدير عام جيد ، مواده: اضغط هنا

22) جيوفيزياء: هي تطبيق لقوانين الفيزياء علي الجيولوجيا اللي هي علوم الارض وهو بيدرس الارض من ناحيه الخواص الفزيائيه وهتدرس فى سنة اولى اول مقررين جيوفيزياء 1 & 2 مقدمة عامة للجيوفيزياء ومبادئ أساسية عن Gravity & Magnetic فى الترم الاول و Electric & Seismic فى الترم التانى ، والجيوفيزيائى بيشوف الاستجابه الكهربيه او المغناطيسيه للارض و استخدم موجات السزميك والالكترك والجرافيتي والماجنتيك او غيرهم عشان اعرف فين المكان الغريب اللي في استجابه مختلفه عن اللي حوليه ، وهو ملوش علاقة بالحفر هو فقط بيجمع معلومات ويحللها ويقرأها ويحدد اماكن تواجد البترول او المياة او اى حاجة تحت الارض ، وشغله: التنقيب قبل ما احفر عشان اطلع الحاجه سواء فى شركات البترول او المياة او المعادن او الابار او الاثار او اى حاجة تحت الارض ، شروطه: اختار جيولوجيا وجيوفيزياء واجيب فيهم جيد والقسم ببدخله من 15 ل 20 طالب الاعلى فى التقدير العام وحطينه رغبة اولى ، مواده: اضغط هنا

رابعا: البرامج الخاصة وهما برنامج علوم البترول الجيولوجية وبرنامج البيوتكنولوجي، والتخصص فيهم بيكون من سنة اولى ، والقسمين بدون شروط ومفتوح العدد لاى طالب يدفع 12 الف جنية فى السنة + 10% زيادة كل سنة

23) علوم البترول الجيولوجية: القسم موجود فى كليات العلوم جامعات القاهرة وعين شمس والاسكندرية والمنيا والاسماعيلية وبورسعيد والمنوفية والمنصورة واسيوط وغيرهم وفى بعض الجامعات القسم *ببلاش* زي السويس والزقازيق وبورسعيد والمنيا ، وفى البعض الاخر بمصاريف زي اسيوط ب 7 الاف ، وفى القاهرة ب 12 الآف جنية + 10% زيادة كل سنة (كان ب 8 من سنتين ولكن زودوا المصاريف بدون اى اضافة خدمة للطالب) وبتدرس فى سنة اولى كيميا وفيزياء ورياضة وجيولوجيا وجيوفيزياء 1 & 2 وبتتخصص من سنة اولى فى القسم ومبتكونش مهندس بترول بتبقي جيوفيزيائى او جيولوجي ، مشكلة القسم ان شغله صعب تلاقيه ولدرجة ان فى ناس تقولك معكش واسطة متدخلوش لانك مش هتلاقى شغل ، بيدخل القسم اى حد هيدفع فلوس ومفيهوش اى ميزة عن الاقسام العادية ، ولا فى مبنى خاص بي ، ولا معامل خاصة بي ، ولا اى حاجة سوا المواد اللى بتدرسها فقط ، وشغله: نفس شغل قسمي جيوفيزيا وجيولوجيا فادخل اى قسم منهم ووفر فلوسك من البداية ولو مش ضامن تدخلهم ممكن تحاول فى سنة اولى تجيب تقديرهم وتتخصص في واحده منهم ولو مجبتش تقديرهم فى اولى عادى تقدر تدخل بترول من سنة تانية وتبقي وفرت ع نفسك فلوس سنة اولى ، مواده: اضغط هنا

24) بيوتكنولوجي: البرنامج موجود فى كليات علوم جامعة القاهرة واسكندرية وحلوان والمنصورة والزقازيق وبنها والسويس وغيرهم وفى كليات زراعة جامعات كتيره بردو وموجود فى زراعة القاهرة بمصاريف ، وفى بعض الجامعات ببلاش سواء من زراعة او علوم زى جامعة السويس والزقازيق ، ولكنه فى القاهرة وبعض الجامعات خاص ب 12 الف جنيه في السنة + 10% زياده سنويه (كان ب 9 من سنتين ولكن زودوا المصاريف بدون اى اضافة خدمة للطالب) ، والبرنامج متاح لطلبة علمي علوم ورياضه ، بتدرس العامل الوراثي في النبات والحيوان والانسان وده مدخل لعلاج الامراض ، اما بالنسبة للنبات والحيوان فممكن تتدحل لزيادة الانتاج ، وبيدرس علم الاحماض النووية وتحاليله والمناعة وكيميات كتير زي الكيميا العضوية والغير عضوية والكيمياء الفيزيائية والتحليلية وغيرها ، شغله: له نفس شغل اقسام كيمياء حيوي وميكروبيولوجى وكيميا حيوان ، وبره مصر بيشتغل فى المستشفيات لعلاج الامراض الوراثية ، وفى معامل التحاليل الاحماض النووية وغيرها ، مواده: 
اضغط هنا                                                           لمعرفه  المواد    اضغط هنا


تعليقات