نظام الساعات المعتمده في جامعات مصر والفرق بينه وبين النظام القديم
النظام الجديد بيحاسبك بالساعات المعتمدة + سمر كورس ، اما النظام القديم فبيجاسبك بالمواد لو نزلت فى مادتين تطلع بيهم السنة اللى بعدها بدون اى مصاريف اضافية ولو نزلت فى ثلاث مواد بتعيد السنة بردو بدون مصاريف اضافية.
2. آيه نظام الساعات المعتمده؟
بمعني انت دلوقتى مثلا بتاخد مادة الرياضه ، بتاخد كل اسبوع محاضره وبتاخد سكشن ، المحاضره بتبقى ساعتين والسكشن 3 ساعات فاحنا بنحسب حاجة اسمها الساعات المعتمده للماده كالاتى ان اى محاضره الساعتين بتوعها بيتحسبوا بساعه معتمده ، وان اى معمل او سكشن الساعتين او 3 ساعات بتوعهم بيتحسبوا بساعه واحده معتمده فكده تعالى نحسب الساعات المعتمده بتاعة الرياضه ، محاضره ساعتين = ساعتين معتمدتين ، سكشن تلات ساعات = ساعه واحده معتمده ، يبقى مادة الرياضه كده ب 3 ساعات معتمده ، لو حسبتها فى الخمس مواد هتلاقى انك بتاخد فى التيرم الاول 15 ساعه معتمده بس كده ، يعنى هى طريقه لتحويل المواد الى ساعات معتمده ، ولو اخدت متطلبات جامعة المتطلب الواحد = ساعتين معتمدتين (لان مفيهاش عملى هما نظرى بس) ، ولما تيجى تطلع تانيه مش هيقولك انت معدى كام ماده عشان تطلع تانيه لا هيقولك انت معدى كام ساعه معتمده بس اهم حاجة تكون نجحت فى 18 ساعة معتمدة من مجموع ساعات الترمين "من غير المتطلبات" عشان تطلع سنة تانية .
3. ازاى احول من كلية تطبق النظام القديم لكلية تطبق الساعات المعتمدة او العكس؟
فى جامعات مش بتقبل التحويل لمجرد انك نظام قديم ، وفى مش بتقبل لمجرد انك نظام جديد ، وفى بتقبل بس بيعيدوك السنة كلها ، وفى بتقبل ويحذفولك المواد اللى انت اخدتها زى اللى عندهم ويشيلوك المواد اللى مدرستهاش ، فاسئل فى شئون الجامعة اللى هتحول لها لانها هى الجهة الوحيدة المسئولة واللى عندها علم بكل الاجراءات اللى هتم فى حالة التحويل ، مع العلم ان كليات الازهر لا يمكن التحويل منها او إليها ، ولو عايز تفاصيل اكتر عن التحويل اضغط هنا
4. ايه هو السمر كورس (الترم الثالث) ؟
هو فصل دراسى للطالب الذى رسب فى مادة او مادتين او ثلاث مواد خلال السنة الدراسية الواحدة ، وذلك بمقابل مادى 600 جنية للمقرر الواحد ابو 3 ساعات اى ما يعادل 1800 جنية لثلاث مواد بتسعة ساعات معتمدة يدرس فيها الطالب المقرر(ات) لمدة 5 اسابيع بمعدل محاضرتين وسكشنين فى الاسبوع الواحد للمقرر الواحد ، ويبدأ الفصل الصيفي بعد اسبوعين من اعلان النتيجة مع العلم ان النتيجة تعلن بعد الامتحانات بيوم واحد فقط ، وتعتبر ادارة الكلية الفصل الصيفي فصلا اختياريا للطالب ، وهو كذلك ، ولكنه فى الواقع يعتبر اجبارى للطالب الذى يرغب فى التخرج من الكلية فى 4 سنوات فقط وليس اكثر ، ملحوظة: السمر كورس للمقرر الواحد كان منذ 5 سنوات ب 50 جنية ثم اصبح ب100 ثم 400 فى سنوات 2012 ، 2013 ، 2014 ثم 2015 اصبح ب 600 جنية للمقرر الواحد صاحب الثلاث ساعات المعتمدة اى بمعدل 200 جنية للساعة المعتمدة الواحدة
سعر الساعة المعتمدة الواحدة فى السمر كورس فى جميع كليات العلوم التى تطبق نظام الساعات المعتمدة على مستوى الجمهورية
(بدون مصاريف) فى الزقازيق
( 50 جنية ) فى المنصوره ، وشبين *اول سنة تبقى بفلوس*.
( 75 جنية ) فى المنيا ودمنهور.
( 100 جنية ) : بني سويف ، كفر الشيخ ، اسكندرية ، بورسعيد ، اسيوط ، طنطا ، بنها ، اسيوط و400 جنية لقسم بترول اسيوط.
( 150 جنية ) فى قناة السويس ، وعين شمس بنات.
( 200 جنية ) فى القاهرة.
4. اعمل ايه عشان منزلش سمر كورس واضطر ادفع فلوس اد كدا او انى اتخرج متاخر؟
بص هقولك امامك 3 اختيارات:
1) انك تذاكر اول باول فتنجح صافى وبتقدير كمان.
2) متذاكرش اول باول فتنزل فى مادة او اكتر وساعتها هتضطر تنزل سمر.
3) متذاكرش اول باول فتنزل فى مادة او اكتر وتختار انك متنزلش سمر وساعتها هتتاخر فى التخرج عن 4 سنوات.
ليه بقى؟ لان المادة اللى انت نزلتها دى مش هينفع تاخدها فى سنة تانية لان كل الساعات اللى عندك مليانه يا اما تاخدها ومتاخدش بدالها مادة من مواد سنة تانية وساعتها بردو هتضطر تاخدها فى السمر بتاع سنة تانية او تاجلها هى كمان لسنة تالتة وهكذا.
وفى مادة بتوقف بعدها مادة تانية او اكتر ، يعني ايه بتوقف؟ يعني مينفعش تاخدها الا لما تنجح في الاولانية اللى بتوقفها مثال: رياضة 1 بتوقف رياضة 2 ورياضة 2 بتوقف رياضة 3 ، فلو انت جيت نزلت فى رياضة 1 واخدتها ترم تانى فهتضطر بعد ماتنجحها انك تاخد رياضة 2 فى السمر كورس ب 500 جنية ولو اخترت انك ما تدخلهاش فى السمر هتاخدها فى سنة تانية ترم اول وبكدا هتاجل مادتين من تانية ترم اول ، دوامه هتدخلها ومش هتخرج منها الا بعد 5 او 6 سنين من الكلية لمجرد انك مش قادر تدفع لكلية المفترض انك داخلها بالمجموع مش بالفلوس.
الجامعات التي تعمل بنظام الساعات المعتمده لكليات العلوم هي
القاهره - الاسكندريه - اسيوط - بنها - بني سويف - دمنهور - بورسعيد - الزقازيق
- جامعه قناه السويس - طنطا - كفر الشيخ - المنصوره - المنوفيه - المنيا - عين شمس بنات
الجامعات التي لا تعمل بنظام الساعات المعتمده هي
الازهر - عين شمس - حلوان - دمياط - اسوان - الفيوم - سوهاج - جنوب الوادي - اسوان
إرسال تعليق